»Ein Gentleman hetzt nicht«

Hast d' as g'hört, Kop'ratawaschel,
Daß a Dschendleman net hetzt?
Drunt in Würzburg hamm s' dös g'funden.
Ja, was sagst denn jetzt?

Hat da Mensch vielleicht sei Votzen,
Daß er s' freundli halt'n müaßt,
Bal a lutherische Mischeh'
Unseroan vadriaßt?

Und was tatst denn auf da Kanzel,
Bal ma nimma schimpfen kunnt;
Auf dö Bauernbündlalackel
In da Kircha drunt?

Überhaupts, was hast denn nacha,
Wenn ma gar koa Gaudi g'spürt?
Wenn 's so staad is bei de G'scheerten,
Und si nix mehr rührt?

Drah net auf, Kop'ratawaschel!
Würzburg geht di ja nix an,
Und du bist, dös woaß a jeder,
Nia koa Dschendleman.